Abang Johari muji agih RM162 billion ungkup Sarawak nengah Bajet 2027

KUCHING, 10 Okt : Premier Sarawak Datuk Patinggi Tan Sri Abang Johari Tun Openg meri puji basa ngagai Perintah MADANI diiring Menteri Besai Datuk Seri Anwar Ibrahim bekau ari penambah agih ari Perintah Besai ngagai Sarawak nengah Bajet 2027.

“Aku meri terima kasih ngagai perintah besai laban udah nambahka agih ninting taun ungkup Sarawak ngagai RM16.2 bilion,” ku iya maya bejaku ba Pengerami Baris Beradat enggau Gempuru Besai beserimbai enggau Pengerami Hari Pengada Ke-80 Tuai Pemegai Menua Nengeri Sarawak Tun Pehin Sri Dr Wan Junaidi Tuanku Jaafar ba Padang Merdeka, ditu sehari tu tadi.

Kemari, Anwar madahka agih belanja RM18.7 bilion ungkup Sabah enggau RM16.2 bilion ungkup Sarawak ba taun 2027, ditangkan dibaruh Bajet 2026, Sabah nerima agih RM17.6 bilion, lalu Sarawak (maya nya suba) bulih RM15.1 bilion.

Berebak enggau nya, Abang Johari madah sekumbang pejalai kereja ba bidang pengelikun, politik enggau administrasyen nyadi kaban Kabinet Perintah Besai,  Tun Dr Wan Junaidi udah napi bemacham pengawa berat ti nempa sejarah menua enggau Sarawak.

Premier Sarawak mega madahka peneleba ke besai iya dalam bidang pengelikun, undang-undang, konstitusyen sereta administrasyen meri tinjau penuh dalam meretika dinamika pemerintah, kelimpah pemar enggau tanggungpengawa dalam nentuka penegap sereta pemansang nengeri enggau menua.

Bisi 107 kontinjen datai ari tujuh kategori bebida ngaul ejensi perintah, opis bekanun, peribit, institusyen pelajar, sereta serakup ukai perintah (NGO),
lalu urung 5,000 penyereta ngambi bagi ba dalam pengawa baris nya.

Kelimpah ari nya, pengerami rasmi hari pengada Tuai Pemegai Menua (TYT) Sarawak diatur berengkah 8 oktober nyentuk pagila, lalu bisi bemacham achara bisi diatur nyengkaum Gempuru Sampi enggau Pengawa Beterima Kasih ari batang pengarap bukai, Pengawa Beradat Meri Tanda Pangkat Besai Nengeri Sarawak, Pengerami Makai Lemai Nengeri sereta Pengerami Ngirup Teh.