Jalai nuju Pasar Kabong deka tampak, 557 lampu solar deka dipasang

KUCHING, 15 Okt: Sepenyampau 557 unit lampu solar LED udah dikelala deka dipasang sepanjai jalai ari simpang Jalai Besai Pan Borneo nuju Pasar Kabong ti mungkur pemanjai 37.7 kilometer enggau anggar kos RM3.62 juta.

Sapit Menteri Infrastruktur enggau Pemansang Penyangkai Kapal, Datuk Aidel Lariwoo madahka, pengawa masang lampu jalai tambah tu betuju nambahka pengelikun penguna jalai lebih agi maya malam hari.

“Ungkup penerang YB Kabong, opis menteri aku udah beratika isu bekaul enggau kurang lampu ba kandang endur ke bisi simpang jalai, jematan enggau genturung pendiau.

“Opis Kereja Raya (JKR) Sarawak udah ngelala kandang endur ti begunaka pengawa masang lampu solar LED,” ku iya.

Iya madah munyi nya lebuh nyaut tanya ari Kaban Kunsil Nengeri (ADUN) Kabong, Dato Mohamad Chee Kadir rambau Aum Kunsil Nengeri (DUN) Sarawak Ke-19 sehari tu.

Ku Aidel madah, pengawa masang lampu LED solar ba jalai nya entara pengawa dikena ngangkatka tikas penampak, ngurangka risiko penusah bebadi sereta meri pengelantang ngagai penguna jalai enggau peranak lokal.

Ku iya madah, sebedau tu bisi 700 unit lampu LED solar dipasang Kaunsil Pelilih Saratok nengah agih belanja Ejensi Pemansang Bagi Menua Betong (BDDA) taun nyin tadi berengkah ari simpang Roban nyentuk ke Pasar Kabong.

“Pengawa masang lampu dipejalaika ba penyauh 30 meter ba kandang endur tiku jalai enggau 60 meter ba endur jalai lurus dikena ngangkatka tikas pengelikun penguna jalai,” ku iya.

Nangkan ke nya, ku iya nerang, pengawa masang 557 unit lampu LED solar tambah ba simpang Pan Borneo nuju Pekan Kabong dipelaba ulih ngemanahka agi tikas penampak ba sepanjai jalai nya.

“Kelimpah ari pengawa masang lampu LED solar, JKR Sarawak ngambi langkah strategik baka masang ‘blinker’, ‘roadstud’, papan tanda enggau garis jalai sepanjai jalai dikena nentuka pengelantang enggau pengelikun penguna jalai,” ku iya nerang.-TVS