Projek ngerawang Kuala Baram nyapai 90 peratus, tumu ari taga

MIRI, 21 Sept: Projek Ngerawang Kuala Baram enggau kereja ti bekaul ke udah dipejalaika Kaunsil Penyangkai Miri (MPA) diatu nyapai penembu urung 90 peratus, iya nya tumu ari taga dalam kontrak.

Ku MPA ba sebengkah penerang madahka pemansang nya dipadah ngagai Sapit Menteri Infrastruktur enggau Pemansang Penyangkai Kapal Sarawak, Datuk Majang Renggi, lebuh iya ngabas taba projek di Kuala Baram, sehari tu tadi.

Ku penerang nya, Datuk Majang enggau pegawai Opis Menteri Infrastruktur enggau Pemansang Penyangkai (MIPD) diberi penerang ari Menijar Besai MPA, Serawa Budol, perunding projek sereta kontraktor bekaul enggau pemansang projek nya.

Iya mega bisi matau pemansang fizikal kereja ke benung digaga ba taba.

MPA madahka, pemansang urung 90 peratus nya mandangka projek nya chukup manah enggau tumu ari taga baka ke ditetapka dalam kontrak.

Pengawa ngabas nya mega mantaika komitmen Perintah Sarawak nengah MIPD dalam nyamin pemansang sektor penyangkai dipejalaika sechara berurun, responsive ngagai peminta industry sereta setipak enggau aspirasyen Strategi Pamansang Pasca COVID-19 (PCDS2030) enggau Juluk Pemansang Tunas (SDGs).

Ku MPA, raban bekuasa sektor penyangkai kapal di Sarawak deka terus nambahka kapasiti, pemanah operasyen enggau pemeruan kena ngenegapka daya besemekih sektor penyangkai kapal.

Pengawa nya beguna amat kena ngenegapka pengawa sektor penyangkai kapal Sarawak nyadi entara pemungkal ngagai pemansang ekonomi nengeri.-TVS