Sarawak deka nempa undang-undang ngintu pesaka

KUCHING, 21 Sept: Sarawak deka nempa undang-undang baru dikena nagang sereta ngintu begunan, monument, enggau reta pesaka ba selampur wilayah tu ngambika enda lenyau ketegal segang pemansang.

Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madahka, undang-undang nya entara langkah nyamin pesaka asal nengeri terus diintu ungkup rebak dudi.

“Tang, sebedau undang-undang nya dipansut, kitai patut lebih dulu ngaul raban bansa ba renggat baruh lebih agi orang ti ngempu premis nya. Kitai enda ulih terus bejalaika perkara nya sebedau nanya penemu sida.Chara nya enda betul.

“Kitai patut ngaga sesi kaul atur enggau nerangka ngagai sida pasal aset-aset tu deka diintu kena dudi hari,” ku iya rambau aum media sepengudah bejadika program Heritage Future: Voices of Old Kuching, sehari tu tadi.

Ku iya, entara kandang endur ke diberi tumpu tumu iya nya Jalai Gambir, Main Bazaar enggau Lebuh India ke bisi mayuh macham begunan sereta monumen sejarah nyengkaum Old Court House, Round Tower, Square Tower enggau Masjid India.

Iya mega madahka, penguntung pengempu premis mega deka diperunding nengah sesi kaul atur sebedau siti kandang endur tauka begunan dipansutka, ngaul penyendia duit pampas enti nyema diguna.

Karim madah pengawa ngintu pesaka majak beguna ketegal pemansang mengeri, nyengkaum bejalaika Transit Rintai Autonomi (ART) ke begunaka perambu ti uh tisih kena nyamin pemansang enda empas ngagai aset sejarah.

“Enti kitai enda merambu enggau manah, sebagi ari begunan nya engka direrak tauka tekeruga.

“Nya kebuah enggau pemisi bajet undang-undang enggau atur ke patut dikena nagang sereta ngintu begunan enggau monumen lama tu, nya ulih dijaga ungkup rebak dudi,” ku iya.-TVS