Sarawakku Sayang nyadi pelasar rayat ngulihka penerang ari ejensi perintah

BETONG, Sept 25: Program Sarawakku Sayang (SKS) nyadi pelasar ke beguna amat ngagai komuniti lokal ngulihka penerang enggau servis terus ari mayuh bengkah ejensi perintah ke bekaul.

Kaban Parlimen Betong, Dato Dr Richard Rapu beterima kasih laban program nya ulih diteruska pengudah ditangguh urung dua minggu ketegal sebun asap enggau gaya hari ke enda manah.

Ku iya madah, pengawa ngatur SKS serak tu meri peluang ngagai komuniti di Bagi Menua Betong ngulihka bemacham penerang sereta tanya ngagai ejensi perintah ti digempung dalam siti program.

“Program tu nyadi ruang enggau pelasar ngagai rayat laban semua ejensi perintah digempung dalam siti program.

“Nyadi, aku nesau rayat di Bagi Menua Betong ngambi awak tu, bela datai ngulihka penerang sereta ngenataika tanya ngagai ejensi ke bekaul,” ku iya lebuh dirandau TVS ba program SKS Betong sehari tu.

Berebak enggau nya, Richard nerangka orang ke enda entu gerai tauka sensitif enggau sebun asap dilalau ngena sengkabung mua tauka idung lebuh ba palan program.

Edisyen SKS Betong pengelama tiga hari tu ditaga matak lebih 100,000 iku temuai sepemanjai tiga hari program berengkah ari 25 ngagai 27 September tu ba Kompleks Lumba enggau Main Betong.

Kelimpah bemacham pengawa eksibisyen enggau servis ari ejensi perintah, bala temuai mega bepeluang nyereta chabut tikit benasit ke diatur ninting hari ti nyendiaka perais besai sebuah kerita Perodua Bezza.

Richard mega meransang mensia mayuh bela sampal datai enggau diri sebilik enggau ngambi bagi dalam bemacham aktiviti enggau pematak ti bisi disediaka sepemanjai program nya nyengkaum program pemakai lokal nengah segmen Dapur Betong. – TVS