Stadium Taha Ariffin ditaga tembu dikemanah Oktober tu

BETONG, Sept 25: Kereja ngemanahka Stadium Taha Ariffin ke benung chakah dipejalaika sereta ditagaka tembu penuh dalam bulan Oktober tu.

Sapit Menteri Pemansang Nembiak, Lumba enggau Main sereta Pemansang Pedagang Sarawak, Datuk Gerald Rentap Jabu madahka, entara batang pengawa ti udah tauka benung dipejalaika nyengkaum nanam rumput, ngemanah bilik endur nukar gari sereta ngemanahka kerusi dalam stadium.

Datuk Gerald Rentap Jabu lebuh dirandau TVS ba program Sarawakku Sayang (SKS) Betong sehari tu tadi. Nadim Bokhari (TVS)

Ku iya madah, sukut pengelikun mega diberi perati dikena nentuka stadium nya ulih nangkup penatai temuai enggau penyampau ke besai sereta dalam gaya ke likun enggau lantang.

“Diatu kami bisi ngubah bilik nukar gari enggau ke bukai nyengkaum kerusi enggau perengkaguna bukai.

“Udah nya, baka ni kitai ulih nentuka orang ulih masuk sereta keluar enggau likun laban enti stadium penuh, mayuh utai ke diguna ari sukut emergensi enggau ke bukai ke patut diperatika kitai,” ku iya lebuh dirandau TVS ba Program Sarawakku Sayang (SKS) Betong ditu, sehari tu.

Berebak enggau nya, iya madahka sukut pengelikun mesti nitihka guna enggau standard ti udah ditetapka Opis Bomba enggau Penyah Penusah Malaysia (JBPM) enggau Polis Diraja Malaysia (PDRM).

Tandu iya, pengawa ngemanahka nya ukai semina betuju nangkup guna pengawa ngatur main bol, tang mega nentuka kesemua perengkaguna stadium dalam gaya ti kondusif sereta likun dikena.

“Kitai enggai orang niki pagar enggau pekara bukai nyadi. Nya enda likun.

“Nya alai, pengawa ngemanahka tu deka dipejalaika sechara berenggat lalu kami mega deka bejalaika audit pengelikun ngambika stadium tu ulih dikena nitihka tikas pengelikun ke lebih tinggi,” ku iya.-TVS