Status UNESCO Niah muka peluang ekonomi lebih besai ngagai komuniti

Miri, 21 Sept: Status Taman Negara Niah nyadi Taba Pesaka Dunya UNESCO patut meri empas pemaik ekonomi ti besai agi ngagai peranak menua nya nengah pengawa ngemansangka produk enggau peneleba nemuai.

Sapit Menteri Luar Nengeri, Dato Lukanisman Awang Sauni madahka, penatai temuai patut diguna raban bansa enggau manah nengah nyendiaka produk, pemakai, krafjari enggau peneleba ke ulih nyungkak penatai pemisi.

“Enti temuai datai, sida iya ukai semina ngiga peneleba, tang mega begunaka produk, krafjari, pemakai enggau cherita ke ulih dibai pulai,” ku iya ba Pengerami Nangguhka Program Latih Park Guide ba Taman Negara Niah, sehari tu tadi.

Iya ke mega Kaban Parlimen Sibuti madahka, bepelasarka rikod Sarawak Forestry Corporation (SFC) Taman Negara Niah nerima 29,426 temuai kena taun 2025, ti ngaul 26,067 temuai lokal enggau 3,329 temuai antarabansa.

Ku iya, penyampau penatai nya mandangka pontensyel besai ngagai komuniti ngemansangka rentayan rega temuai ke lebih dalam agi.

“Enti kitai bisi produk-produk ke lebih narit ati, aku pechaya penyampau belanja temuai deka nambah mayuh.

“Komuniti patut nyendiaka produk enggau peneleba ngambika temuai ukai semina datai, tang mega bebeli enggau mai pulai utai dikena nyadi pengingat,” tambah iya agi.

Iya mega meransang raban Park Guide ngena media rama baka TikTok, Facebook enggau Instagram dikena ngelakuka penyelai Niah ngagai makit ke besai agi.

Raban Park Guide mega mangku pengawa nyadi pencherita ke ulih mantaika sejarah, pesaka, arkeologi enggau penyelai rampa menua Niah ngagai temuai.

“Ke bendar agi iya nya penyereta komuniti lokal laban Gua Niah ukai semina diempu raban pengatur, tang mega nyadi sebagi ari pengidup raban bansa ba menua nya,” ku iya.

Sepenyampau 20 penyereta mujur nembuka Program Latih Park Guide ke bejalai pengelama 18 hari berengkah 5 nyetuk 22 September.

Latih nya mega ngaul lapan pemegai taruh enggau 11 penyereta ari komuniti lokal ngarika tujuh kampung ke semak, lalu semilan agi penyereta peranak menua ari Miri.

Program nya ngaul tujuh modul ba baruh ‘Generic Park Guide Training Module’ enggau semilan modul ba baruh ‘Park Product Training Module’.

Tiga modul besai ke meri fokus ngagai Taman Negara Niah iya nya kelala Taman Negara Niah nyengkaum pejalai nuju status Taba Pesaka Dunya UNESCO, pengawa ngelindung burung layang-layang sereta pansik arkeologi.

Iya ngansak raban penyereta ke deka nerima lisin Park Guide ngambika semampai aktif enggau nambah penemu, disiplin, integrity sereta pengelandik diri empu.

“Nyadi baka raban Park Guide ke bisi penemu, disiplin, integriti enggau bekaliber. Ba maya ke sama, nyadi meh duta mit Tamam Negara Niah ke ulih mandangka penyelai, sejarah, pesaka enggau pemanah rampa menua kandang endur tu ngagai temuai lokal enggau antarabansa,” ku iya.

Iya mega madahka Taman Negara Niah ditaga dibuka baru pun bulan Oktober, seraya meri ruang ngagai raban Park Guide enggau komuniti menua nya empu kena ngerebut peluang ke bisi-TVS