Enam endur arung ngelih diperambu ba Jalai Bakun

BINTULU, 22 Sept: Perintah merambu ngaga arung ngelih ba enam kandang endur di sepanjai Jalai Bakun dikena nambahka pengelanchar pejalai perengka pengangkut berat, ku Datuk Alexander Nanta Linggi.

Menteri Kereja Raya nya madahka, perambu nya nyadi langkah tumu sebedau jalai nya dibuka ngagai dua arung penuh.

Pengawa ngaga arung ngelih diungkupka ngagai perengka pengangkut berat ngena arung kiba, seraya meri ruang ngagai perengka pengangkut bukai ngelih nengah arung ke lebih likun.

“Mayuh perengka pengangkut ke berat. Enti bisi arung ngelih, lebuh datai ba arung ngelih perengka pengaangkut berat nya patut tama arung kiba ngambika perengka pengangkut bukai ulih ngelih enggau lanchar,” ku iya lebuh dirandau maya ngabas projek ngaga baru arung ngelih ba Jalai Bakun, sehari tu tadi.

Terang iya, Jalai Simpang Pan Borneo ngagai Asap Bakun sepanjai urung 128 kilometer nya udah manggai lebih 30 taun enggau diatu napi bemacham penanggul rusak ketegal dikena perengka pengangkut ke berat.

“Jalai tu udah manggai lebih 30 taun, tau disebut jalai lama. Kitai meda sigi mayuh penanggul bekaul tikas jalai tu enggau udah mayuh rusak enti meda perengka pengangkut ke berat nengah jalai tu,” ku iya.

Nitihka penerang mega, pejalai perengka pengangkut ke berat enda ulih ditagang laban jalai nya beguna ngagai aktiviti ekonomi ba menua ngaul sektor kebun sawit enggau pengawa nebang kayu.

Berebak enggau nya, KKR merambu bejalaika pengawa meresa gaya jalai kena taun baru dikena mansik gaya pemanah jalai nya lebih silik di selampur Sarawak,

Nambahka nya, sepenyampau RM28 juta udah dikena taun tu ungkup kereja ngemanah jalai ba kandang endur nya, lalu perambu ungkup belanja RM216 juta dikena ngaga enam arung ngelih ke agi bepanggai ba pemutus penyampau Bajet 2027 ti deka dikemendarka. -TVS