Komunikasyen ti manah entara ejensi nyeliahka rayat napi penanggul

KUCHING, 8 Okt: Semua raban ti bekaul mesti nentuka komunikasyen enggau penyeraris entara ejensi seruran ba tikas pemadu manah dikena nentuka polisi pemansang meri pemaik sereta penguntung ngagai komuniti.

Sapit Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Dr Penguang Manggil madahka, penyeraris ke manah beguna bendar dikena nyeliahka pelasar enggau polisi pemansang ti dipejalaika perintah meri penanggul bukai ngagai rayat.

“Entara pekara ke mesti diberi perati iya nya nentuka pengawa merambu pemansang enda ngasuh isu bah tunggal, penyekut trafik sereta proses peminta nyadi sereta tau meri penanggul ngagai penguna,” ku iya madah.

Iya mansutka jaku nya rambau ngulu Joint Technical Committee Meeting ke diatur ba Bilik Aum, Begunan Kunsil Nengeri Sarawak, kemari.

Aum nya dipenyadika Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Amar Dr. Sim Kui Hian.

Dr Penguang ke mega Kaban Kunsil Nengeri (ADUN) Marudi nerangka, pengawa begulai sama ngaul bemacham ejensi enggau raban profesional ba dalam aum nya endang beguna amay dikena nentuka aspek teknikal, pemansang sereta pemaik mensia mayuh ulih diserariska sechara holistik.

“Komunikasyen enggau kerejasama sechara terus entara semua raban patut ditegapka dikena nentuka proses pemansang bejalai lanchar sereta dikena ngurangka sebarang empas ti tau nating komuniti,” tandu iya.