Ops Sarat: Bisi 75 buah lori diperesa ba Jalai Pan Borneo

BINTULU, 25 Sept: Bisi 75 buah lori bemacham bansa diperesa Opis Pengangkut Darat (JPJ) Sarawak nengah Ops Sarat ba kandang Jalai Pan Borneo, kena Hari Empat.

Operasyen dipejalaika nengah Unit Operasyen JPJ Kapit enggau kerejasama Unit Operasyen JPJ Bintulu nya betuju matau nitihka atur tatak undan enggau pengelikun perengka pengangkut pengawa dagang.

Nitihka penerang JPJ Sarawak, asil peresa antara penyalah ke bisi ditemu, nyengkaum ngundan barang lebih ari tatak ditetapka, muai barang, enggai nimbang barang sereta bungai tayar mipis.

“Mega bisi ditemu penyalah ngelanggar atur permit Kaunsil Lisin Perengka Pengangkut Pengawa Dagang (LPKP), ngundan barang ke ulih ngenataika penusah sereta penyalah teknikal perengka pengangkut.

“Semua pengawa salah ke bisi ditemu nya endang ngelanggar atur undang-undang ke benung diteritka,” ku penerang nya.

JPJ Sarawak ngelalauka raban deriba enggau pemain industri patut nitihka atur raban bekuasa, kelebih agi bekaul enggau proses nimbang perengka pengangkut.

Pengawa ngundan banrang tauka enggai nitih atur nimbang perengka pengangkut ulih kena tinggang ukum nitihka Seksyen 63(1) Akta Pengangkut Darat 1987 ke ulih diukum entara RM2,000 nyentuk RM10,000 tauka ukum jil nyentukka setaun, tauka kededua ukum nya.

Lisin vokasional deriba ba baruh kuasa Direktor Nengeri mega ulih digantung nyentuk tiga bulan, bepanggai atur undang-undang enggau proses ke bekaul.

JPJ Sarawak mega nyemetak madahka pemain industri nyamin tiap pejalai diperambu enggau manah, barang diundan enda lebih tatak dikemendarka, permit patut idup sereta perengka pengangkut seruran likun maya dikena ba jalai raya.-TVS