Sebun Asap: Semua sekula di Serian ditutup, IPU tinggi

KUCHING, 24 Sept: Semua sekula primari enggau sekula sekondari ba baruh kemata Opis Pelajar Pelilih (PPD) Serian ditutup sementara bekau ari bacha Indeks Pengamah Angin (IPU) ke dirikodka tingii naka pukul 10 malam tadi.

Opis Pelajar Nengeri (JPN) Sarawak madah, berindik Ari nya, sesi Ngajar enggau Belajar ba Rumah (PdPR) deka dipejalaika nitih garis lalau ngatur pengawa ngajar enggau belajar ketegal penusah sebun asap.

“Ungkup sekula ba pelilih menua enggau bacha IPU ngelui 200, kepala pengajar enggau prinsipal ulih ngaga pemutus bejalaika PdPR enggau ngambi kira faktor pengerai sereta pengelikun nembiak.

“Nyema trend bacha IPU nurun ngagai tikas baruh 200, raban sekula ulih nyikap diri muka baru sekula,” ku penerang nya.

JPN Sarawak mega nangkan raban sekula ngambika nitihka prosedur operasyen standard bekaul enggau pengawa ngatur sekula lebuh gaya sebun asap sereta ngemeratka pengerai enggau pengelikun nembiak enggau pengajar.

Semua institusyen pelajar ba baruh kemata JPN Sarawak mega dilalau ngambika seruran matau bacha IPU nengah Portal Air Pollutant Index Management System (APIMS) Opis Rampa Menua.

Raban institusyen pelajar mega seruran dipinta ngasika gerah Opis Menteri Pengerai Malaysia dikena nentuka pengerai, pengelikun enggau pengelantang nembiak sereta semua raban pengajar semampai tejamin.-TVS