Pelajar tumu anak mit nyadi puku strategik Sarawak – Awang Tengah

KUCHING, 25 Sept: Pelajar enggau pengawa nyaga tumu anak mit nyadi pengawa meranakka puku strategik dalam pemansang nempa modal mensia sereta ungkup Sarawak jemah ila.

Sapit Premier Sarawak, Datuk Amar Awang Tengah Ali Hasan madahka, pemansang nengeri ukai semina bepanggai ngagai pengawa ngaga infrastruktur, perengka guna sereta industri, tang mega ngaul peluang ke disediaka ngagai rayat berengkah ari umur agi mit.

Ku iya, pelajar tumu nembiak mit beguna dalam nempa modal mensia ke ulih berunding sechara kritikal, bejaku, kerejasama sereta ngemeranka pengawa belajar seumur idup, setipak enggau aspirasyen Sarawak nyadi nengeri ke bepenatai pemisi tinggi manggai taun 2030.

“Perintah Sarawak ngaku pelajar enggau pengawa nyaga tumu nembiak mit nyadi puku strategik dalam pemansang modal mensia sereta ungkup Sarawak jemah.

“Pengawa tu setipak enggau Strategi Pemansang Pasca COVID-19 2030 dalam pengawa ngemansangka Sarawak ke lebih lantang, inklusif enggau meruan.

“Pemansang ukai semina disukat bepelasarka jalai raya, jematan, begunan enggau indusri ke dikemansangka, tang mega bepelasarka peluang ke disediaka ngagai rayat berengkah ari tikas pemadu baruh,” ku iya.

Iya bejaku munyi nya ba sebengkah penerang sebedau bejadika Konvensyen Antarabansa Pra sekula Sarawak (SPIC) 2026 sehari tu tadi.

Awang Tengah madahka, pemansang pengelandik nembiak mit patut dipunka maya umur tumu nengah kaul ke likun, interaksyen ke bisi reti, penemu kreatif, pengarap kena mansik sereta peluang belajar.

Terang iya, pengawa ngenegapka pelajar tumu chukup beguna dikena nyamin anak mit di Sarawak sedia napi jemah ila ke bepanggai ba teknologi, inovasyen enggau ubah, enda ngelaungka pesaka sereta identiti sida iya.

Iya madahka, tiap nembiak mit patut diberi peluang kena ngemansangka potensyel diri empu, lalu pemungkal pengidup sida enda patut ditentuka ari endur diau tauka penatai pemisi ruang bilik.

“Kerejasama ke mungkur semua raban entara perintah, ruang bilik, institusyen pelajar, komuniti, industri enggau sektor ke bekaul beguna amat dikena nyamin pengelikun anak mit di Sarawak seruran dikemeratka” ku iya.-TVS