Sarawak neruska diskaun bil karan 25 peratus ungkup taun baru

KUCHING, 12 Okt : Perintah Nengeri Sarawak deka neruska diskaun bil karan sepenyampau 25 peratus berengkah Januari nyentuk Disember taun baru nengah Bajet Nengeri 2027.

Premier Sarawak Tan Sri Abang Johari Tun Openg mansutka pekara nya maya mantaika bajet nya nyerumba Aum Kunsil Nengeri (DUN) sehari tu madahka pengawa meri diskaun nya deka ngelantangka urung 716,000 penguna domestik di selampur Sarawak, enggau kos sepenyampau RM281 juta.

Perintah nengeri nega madahka subsidi RM5 sebulan ungkup bil ai dibaruh program ai pechuma, ti meri pemaik ngagai 600,000 penguna domestik ngaul agih sepenyampau RM35 juta.

“Inisiatif tu nyereminka sebuah perintah ke diatur enggau manah, panjai runding sereta betanggungjawab, ulih ngimbang disiplin fiskal sereta meri pengelantang rama.

“Nengah negapka rentayan jaga rama, kitai mega negapka pelasar komuniti Sarawak dikena nentuka genap rayat, enda ngira penatai diberi peluang idup enggau manah, bisi pengandal enggau tejamin,” ku iya.

Perintah Nengeri Sarawak sehari tu mantaika Bajet 2027 penyampau RM14.84 bilion bepejuluk “Bersama Membina Kemakmuran dan Menjamin Masa Depan Kita tauka Begulai Nempa Pengelantang enggau Nyamin Pengidup Kitai Dudi Hari”.