Urung 98.9 peratus anak mit di Sarawak bisi pelajar pra sekula

KUCHING, 25 Sept: Urung 98.9 peratus anak mit di Sarawak bisi nerima pelajar pra sekula sebedau masuk Primari Satu, lalu tu mandangka akses pelajar tumu anak mit ba nengeri tu diatu nyau deka serap endur.

Menteri Pemansang Indu, Nembiak enggau Pengelikun Komuniti Sarawak, Dato Sri Fatimah Abdullah, madahka pemujur nya taja pia enda patut dipeda semina nyadi lumur aja, tang nyadi peransang dikena ngemenuhka laluh 1.1 peratus nembiak awak sama bulih akses ngagai pelajar pra sekula ke bisi kualiti.

Ku iya, pemujur nya asil komitmen enda ngetu ejensi perintah, penyendia pra palan peribit, komuniti, pengajar, pelajar enggau apai indai dalam nyamin anak mit bulih pelajar ke tegap kenyau ari renggat tumu.

“Tu nunjukka pelajar pra sekula di Sarawak diatu nyau deka serap endur, tang pengawa nya patut diteruska dikena nyamin nadai siku anak mit tinggal (pelajar),” ku iya ba sebengkah penerang lebuh pengerami Bejadika Konvensyen Antarabansa Pra sekula Sarawak (SPIC) 2026 sehari tu tadi.

Pengerami nya dipenyadika Sapit Premier Sarawak, Datuk Amar Awang Tengah Ali Hasan.

Fatimah madahka, pengawa ngenegapka akses pelajar tumu anak mit patut bejalai seriris enggau aspek keresa enggau kualiti ngambika tiap sida, enda ngira penatai pemisi tauka pengelandik, ngulihka sukung ke sebaka.

Berebak enggau nya, ku iya, Opis Menteri Pemansang Indu, Nembiak Mit enggau Pengelikun Komuniti Sarawak benung ngaga Perambu Pelajar enggau Pengawa Ngintu Tumu Nembiak Mit (ECCE) Sarawak dikena nyendiaka tuju pejalai ke terang agi sereta konsisten ngagai sektor nya.

Terang iya, langgur nya deka ngaul sukut akses enggau kualiti, mungkur semua, pemansang sereta pelajar nembiak mit, profesionalisme pelajar, penyereta diri sebilik, kandang endur likun, penyidi enggau intervensi tumu sereta transisyen ngagai pelajar formal.

“Langgur tu mega betuju nentuka ulih nempa kualiti ECCE seriris enggau konteks Sarawak sereta nyerariska bemacham ejensi enggau penyendia servis bepelasarka asil ke deka dijapai ungkup anak mit,” ku iya.-TVS