Nembiak nyulut peresa UP-DLP bepeluang masuk YSISS

KUCHING, 17 Sept: Peresa Program Dwijaku Sarawak (UP-DLP) nyadi sebagi ari inisiatif Perintah Sarawak ngelala potensyel akademik nembiak dikena ngemansangka modal mensia bepengelandik tinggi lebih agi dalam bidang Sains, Teknologi, Injiniring enggau Matematik (STEM).

Sapit Menteri Utiliti (Sarawak Energy Berhad enggau PETROS) ke mega Kaban Kunsil Nengeri (ADUN) Satok, Datuk Ibrahim Baki madahka, peresa nya ukai semina nentuka pengelayak nembiak masuk Pom Satu, tang mega nyadi instrumen ke beguna dalam nisih tikas akademik sida.

Ku iya madah, nembiak ke nyulut dalam peresa nya mega muka peluang ngagai sida nampung pelajar ba sekula sekondari antarabansa ke dipenggi Perintah Sarawak nengah Yayasan Sarawak International Secondary School (YSISS).

“Sekalika sida pas tauka enda ukai pekara ke beguna. Ke pemadu beguna iya nya kitai ulih ngelala nembiak ke ngulihka prestasi ke nyulut lalu nembiak tu bisi peluang nampung pelajar ba sebuah sekula sekondari antarabansa ke dipenggi Perintah Sarawak nengah YSISS,” ku iya.

Iya madah munyi nya rambau pejalai ngabas Peresa Uji Program Dwijaku Sarawak (UP-DLP) ba Sekula Primari (SK) Merpati Jepang, Kuching, Hari Empat.

Ku terang Ibrahim, YSISS ditumbuhka nengah sanding penemu Premier Sarawak, Datuk Patinggi Tan Sri Abang Johari Tun Openg ke mega nyendiaka peluang pelajar ti bekualiti ngagai bala nembiak ti datai ari ruang bilik ke kurang pemisi.

Berebak enggau nya, kenu ku iya, pengawa ngemansangka modal mensia bepengelandik tinggi beguna bendar dikena nyukung transisyen Sarawak nuju ekonomi bepenatai pemisi tinggi enggau ekonomi digital.

Ku iya agi, Sarawak diatu benung nyeranggap bemacham bidang baru nyengkaum ekonomi digital, hidrogen enggau kuasa ulih dikemaru ti begunaka pengereja pengawa ti bepengelandik dalam bidang STEM.

“Semua tu begunaka modal mensia ti ngembuan pengulih intelektual enggau pengelandik dalam bidang sains enggau teknologi.

“Nya kebuah Matematik beguna amat lalu Jaku English mega bejalaika tanggungpengawa ke beguna laban nya jaku antarabansa,” ku iya.

Nangkan ke nya, inisiatif Peresa Uji Program Dwijaku Sarawak (UP-DLP) nyadi projek pemungkal dikena mantu sekula di sitak Satok ngangkatka prestasi akademik nembiak.

Bisi 187 iku nembiak ari tiga buah sekula ngambi peresa nya ti mungkur 74 iku nembiak ari SK Merpati Jepang, 64 iku nembiak ari SK Rakyat Haji Bolhassan enggau 49 iku nembiak ari SK Combined.-TVS