Rebak biak mesti bepenemu, muka peluang gawa baru

KUCHING, 16 Sept: Rebak biak Sarawak dikearapka ulih nyadi raban ke bepenemu tinggi enggau bisi daya muka peluang gawa baru di wilayah tu.

Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tuanku Jaafar madahka, iya andal anak Sarawak ulih mujur sekalika nyadi saintis, injinir, pemungkal serikat teknologi, pemansik, pedagang sereta tuai komuniti.

“Aku meransang semua rayat ba nengeri tu menatika budaya nyapai penyulut ba dalam tetiap bidang dikena mantu ngemansangka Sarawak ti maju sereta lantang.

“Pengidup jemah nengeri tu bepanggai ngagai pengulih anak Sarawak ngasilka pemansang sereta nempa peluang baru sekalika ngaul bemacham bidang ke bekaul sereta enda ngemeratka pemisi komoditi ti dikembuan wilayah tu,” ku iya madah nengah pesan khas beserimbai enggau Pengerami Hari Malaysia 2026.

Tun Pehin Sri Dr Wan Junaidi nyemetak madahka, rayat Sarawak mesti seruran nyapai standard pemadu manah ba renggat antarabansa baik nya ba dalam pelajar, pansik, lumba enggau main, seni sereta servis perintah,” terang iya.

Ku iya madah agi, pengaya sesebengkah nengeri ukai semina disukat bepelasarka asil ekonomi aja, tang mega pengulih rayat ngerandang penemu, inovasyen sereta pemanah ulah.

“Nengeri ke maju ngembuan pemujur ngadaka raban bansa ti bisi timpai ke jauh, berintegriti sereta semampai sedia ngiga penemu,” tandu iya.

Kelimpah ari nya, iya ngelalau genap iku rayat Sarawak nyadi komuniti ke nemu pasal fakta sereta pintar nisih tauka mida penerang ke diterima sida.