Semua rayat bela ampit ngasaika buah pemansang dibai perintah

KUCHING, 16 Sept: Iringtuai Premier Sarawak, Datuk Patinggi Tan Sri Abang Johari Tun Openg nyata ngayanka langkah rapat pemansang ti inklusif ba menua pesisir bisi daya mai ubah ngagai pengelantang pengidup rayat di wilayah tu.

Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tuanku Jaafar madahka, inisiatif nya mega beguna bendar dikena nentuka komuniti peribumi, perayat ba sesebengkah genturung pendiau sereta rumah panjai bela ngasaika pangka arus pemansang moden ti dibai perintah.

“Progres ke dijapai Malaysia maya diatu mega nunjukka semua rayat bela ampit nerima buah pemansang enggau pemaik pengelantang ekonomi menua,” ku iya madah nengah pesan khas beserimbai enggau Pengerami Hari Malaysia 2026.

Beduduk enggau nya, Tun Pehin Sri Dr Wan Junaidi madahka, pemujur nya nuntut semua raban terus meri perati ngagai pengelantang pengidup orang lunggar umur, orang nyelai pendiau (OKU), komuniti menua pesisir sereta komuniti mudah pedis.

Iya nerangka, pengawa magi agih khas dikena bejalaika pemansang infrastruktur baka jalai, bekal ai beresi enggau elekterik ba kandang menua ulu nyadi pekara pemun ke beguna amat ungkup pengelantang sesebengkah menua.

“Ambika chunto, inisiatif numbuhka beberapa agensi pemansang wilayah baka Agensi Pemansang Wilayah Utara (NRDA), Agensi Pemansang Hulu Rajang (URDA) sereta Agensi Pemansang Tanah Tinggi (HDA),” terang iya.

Entudika nya, beserimbai enggau pengerami Hari Malaysia, iya madahka hari bulan besejarah nya mesti nyadi pengemun ngagai pengawa ngemaruka kuing tuju deka numbuhka menua ke lebih ngemeratka penyama rata, progresif sereta mekuhka ulah mentas.

“Hari Malaysia mega ngajar kitai senentang pemujur enda datai nengah chara muntang.

“Tang, begunaka penyabar, pemintar, penyerakup sereta beati amat ngereja pengawa. Nya alai, aram mih kita semua terus besaup napi pemar sereta ngemeranka semengat ransing bejalaika pengawa,” tandu iya.