UNIFOR nentuka pengarap bukai bepeluang nyaup ngemansangka Sarawak

KUCHING, 16 Sept: Premier Sarawak, Datuk Patinggi Tan Sri Abang Johari Tun Openg nyemetak madahka, perintah nengeri ngemeratka tangkup pengawa Unit Pekara Pengarap Bukai (UNIFOR) ti ditumbuhka kenyau ari taun 2017 dikena nentuka komuniti pengarap bukai mega dipebasa, diberi ruang besemekih sereta ulih nyaup pemansang Sarawak.

Iya madahka, naka ke diatu, perintah Sarawak udah ngemendarka agih penyampau RM685 juta nengah UNIFOR, nyengkaum RM565 juta ungkup pengawa ngaga, nyeruri enggau ngangkatmanah rumah sembiang pengarap bukai sereta mega RM120 juta ungkup sekula misyen di wilayah tu.

“Rumah sembiang ukai semina endur besembiang aja, tang mega bejalaika tanggungpengawa dalam nempa ulah, ngajar nembiak rebak baru, bejalaika aktiviti pengelantang sereta ngenegapka komuniti,” ku iya madah.

Iya mansutka jaku nya nengah teks iya ti dibacha Sapit Premier Sarawak, Datuk Amar Douglas Uggah Embas, rambau ngarika Premier Sarawak ngulu Pengerami Meri Terima Kasih Pengarap Bukai beserimbai enggau Pengerami Hari Malaysia Renggat Nasional Taun 2026, ensanus.

Abang Johari nerangka, peneleba Sarawak nyata ngayanka rayat ti bebida pengarap enggau budaya ulih idup begulai bepelasarka penyedang, pengulih terima sereta bebasaka pangan diri.

“Pemaik enggau penegap nyadi pelasar pengelantang, seraya pengarap entara mensia nyadi penegap ti beguna bendar dalam nempa pengandal dudi hari,” terang iya.

Ngelansa pasal pemibas bepengarap, iya nerangka, perintah Sarawak deka terus bebasaka sereta nyaga pemibas komuniti ngemeranka jalai pengarap diri empu dalam gaya ti likun sereta lantang.

Berebak enggau nya, Premier Sarawak madahka pengerembai teknologi mesti bepelasarka peneka mensia ngambika penguntung nya ulih diasaika rayat, nyengkaum nengah peluang ungkup raban nembiak, ngenegapka pelajar enggau pengerai, sereta ngemanahka servis perintah sereta nentuka nadai siku rayat dikelaungka.

Tandu iya, langkah rapat nya setipak enggau Strategi Pemansang Pasca COVID-19 2030 (PCDS 2030) ti bepelasarka pengelantang ekonomi, penyerakup rama enggau pemeruan rampa menua.