Stor baru Kastam Kuching ngemudah atur barang dirampas

KUCHING, 17 Sept : Pengawa ngatur barang dirampas Opis Kastam Diraja Malaysia (JDKM) di Sarawak diatu ulih dipejalaika enggau chara ti lebih sistematik, likun sereta dijaga nengah perengka guna Stor Barang Dirampas Opis Penerit Adat Kastam.

Menteri Kereja Raya Datuk Seri Alexander Nanta Linggi madahka perengka guna baru beungkus RM9.98 juta nya ulih ngurangka JKDM bepanggai ngagai premis suwa sereta ngenegapka pengawa neritka atur.

“Enggau fasiliti baru tu, pengawa ngatur barang dirampas ulih dipejalaika enggau lebih sistematik, likun enggau dijaga, kelimpah ngurangka panggai ngagai premis sewa sereta ngenegapka penyungkak neritka atur menua,” ku iya nengah sebengkah penerang pengudah Pengawa Nyerahka Stor Barang Dirampas nya ngagai JKDM, sehari tu tadi.

Nanta madahka pengawa ngaga stor baru nya beguna laban perengka guna ke bisi diatu dikena JKDM nya meh premis suwa diempu raban peribit enggau enda ulih agi nampung peminta operasyen ke majak nambah.

Projek nya dipejalaika Opis Kereja Raya (JKR) Malaysia nengah Raban Projek Khas 2 (PPK2), ti berengkah ari 14 Mei 2024 enggau setipikit Ngaku Pengawa Tembu (CPC) projek bekaul ke udah dikeluarka kena 26 Mei lalu.

Iya madahka perengka guna nya ngaul begunan opis operasyen enggau stor barang dirampas disikap enggau tiga iti unit alai nyimpan, bilik kebal, bilik eksibit, endur pengawa nunu utai tebuka sereta sistem nyimpan ke lebih sistematik enggau likun.

Nanta madahka projek nya mega ngena chara Plan Pra-Lulus (PAP) JKR Malaysia nengah tempa tukuh stor barang dirampas Kastam di Seremban, Negeri Semilan, kena nyampatka proses tempa tukuh enggau bejalaika projek.

“Chara tu mega nyemela ke standard tempa tukuh perintah enggau ngemanahka agi pengawa ngena sumber seraya nadai ngeruga pengelikun sereta kualiti,” ku iya nambah pengawa ngaga nya mega ngaul elemen agenda Rampa Menua, Sosial enggau Pengawa Ngurus (ESG) – TVS