Penerang nyemetak mantu mensia mayuh bebelika rumah

MIRI, 18 Sept: Mensia mayuh diperansang ngulihka penerang ke nyemetak sebedau ngaga pemutus bebelika rumah, enda ngira ungkup meli rumah keterubah, ngemanahka rumah tauka beranakka puku reta tanah.

Datuk Bandar Miri, Adam Yii Siew Sang madahka, penemu pasal milih reta tanah, produk rumah enggau perengka guna ti bekaul chukup beguna dikena ngemuntangka mensia mayuh ngaga pemutus bepelasarka peminta enggau pengulih kediri empu.

Ku terang iya, pengawa begulai enggau bemacham raban industri nyengkaum raban pemansang, ejen reta tanah, raban pemekal enggau gerempung ti bekaul meri peluang ngagai mensia mayuh ngulihka penerang sechara terus ari raban nya.

“Enggau bemacham raban pemansang, ejen reta tanah, raban pemekal enggau penyereta industri begempuru, temuai ulih bejaku sechara terus enggau raban ti bekaul, mereti produk ti disediaka enggau ngaga pemutus ke lebih tisih nitihka peminta enggau gaya kediri empu,”ku iya.

Adam Yii mansutka penemu nya rambau Pengerami Bejadika Miri SHEDA Home Property Roadshow 2026, sehari tu tadi.

Iya nambahka, penyereta Opis Wang Turu Pekereja Pengawa (KWSP) mega meri peluang ngagai mensia mayuh meretika perengka guna enggau pemilih ti disediaka dikena mantu pejalai ngagai pengawa ngembuan rumah.

“Penyereta KWSP meri penguntung tambah ngagai mensia mayuh, kelebih agi sida ti deka meretika perengka guna enggau pemilih ke engka ulih mantu sida dalam juluk bebelika rumah,” ku iya.

Miri SHEDA Home Property Roadshow 2026 diatur pengelama empat hari berengkah 17 nyentuk 20 September ba Bintang Megamall Miri.

Bisi 14 reruai disediaka enggau penyereta raban industri ari Miri, Bintulu, Samalaju enggau Kuching, mandangka bemacham produk sereta servis bekaul kereban rumah enggau reta tanah. -TVS