‘Seminar Kamek Digital Pantu’ narak penemu digital ngagai komuniti

PANTU, 18 Sept: ‘Seminar Kamek Digital Pantu’2026 nyadi pelasar dikena narak penemu digital ngagai komuniti lebih agi ba sitak Pantu.

Program ke diatur Angkatan Zaman Mansang (AZAM) Sarawak begulai enggau Sarawak Digital Economy Corporation (SDEC) nya betuju nambahka penemu digital ngagai mensia mayuh.

Pengawa nutup Seminar Kamek Digital Pantu 2026 dikemujurka Tuai Pegawai Eksekutif AZAM Sarawak, Tuan Ali Suhaili ba Rumah Maureen Kara Atas Pantu, kemari.

Pengelicha program, Regina Lambor madahka program nya udah meri pemaik ngagai peranak rumah panjai, kelebih agi bala tuai raban bansa.

Ku terang iya, penemu digital tu endang patut dipelajarka semua raban enda ngira renggat umur tauka batang pengawa dikereja.

“Penemu bekaul digital chukup beguna lalu patut dipelajarka semua kitai.

“Nyadi siti pekara ti pemadu beguna diatu (pengelandik digital) dikena ngulihka penerang ke pemaik mensia mayuh,” ku iya.

Iya madahka, ari bisi pengelandik digital dia mensia mayuh deka nyamai bulih penerang ke pemadu baru seriris enggau ubah pemansang ke maya hari. -TVS