SLF 2026 ngenegapka aspirasyen Miri nyadi Mengeri Litaricha UNESCO

MIRI, 18 Sept: Sarawak Literature Festival (SLF) 2026 ukai semina ngempuruka penulis enggau peminat bup, tang nyadi platform ngenegapka ekosistem litaricha lokal sereta nyukung aspirasyen Miri nyadi penyereta UNESCO Creative Cities Network (UCCN) dalam bidang litaricha.

Program ti keterubah dipejalaika Pustaka Nengeri Sarawak nya bejalai pengelama lima hari, nyentuk 27 September, enggau Stadium Tertutup Miri nyadi panggau besai, kelimpah ba Pustaka Nengeri Sarawak, Miri enggau Miri Handicraft Centre.

SLF 2026 mandangka tiga isi besai iya nya Book Fair Festival, Book Authors Festival enggau Pengerami Sarawakian, ke meri ruang ngagai mensia mayuh dalam bejaku enggau nulis, mansik karya lokal sereta ngelala pesaka adat Sarawak.

Pengerami nya mega mantaika mayuh macham aktiviti ngaul sesi begulai enggau penulis, randau bekaul enggau bup, forum litaricha, seminar nulis kreatif, aktiviti becherita, program nembiak enggau literasi komuniti.

Udah nya bisi mantaika main asal, seminar kraf, muzik, pantun enggau pekit ke bukai.

Pengerami bejadika ditaga diatur kena 24 September, pukul 2 lemai ba Stadium Tertutup Miri enggau deka dipejadika Premier Sarawak, Datuk Patinggi Tan Sri Abang Johari Tun Openg.

Entara isi pengerami iya nya nyerahka Anugerah Librari Premier Sarawak nyadi pengaku dalam pemujur nyulut librari komuniti enggau librari genturung pendiau.

Enggau tagit penatai entara 20,000 nyentukka 50,000 temuai, SLF 2026 mega muka ruang ekonomi ngagai pedagang lokal nengah bazar pemakai, kraf jari enggau bedagang bup.

Raban pengatur pengerami nagitka pengerami nya terus mansang diangkat nyadi achara litaricha ninting taun di Sarawak, enggau Sibu diperambu nyadi tuai rumah ungkup taun 2027 ditangkan Kuching tuai rumah 2028.- TVS