Lumba SEA 2027: Pengawa ngemanahka Stadium Sarawak tumu ari taga

KUCHING, 17 Sept: Pengawa ngemanahka Stadium Sarawak nunjukka pemansang positif lebuh projek nya diatu udah nyapai 33.65 peratus, tumu ari tagit asal sepenyampau 30.79 peratus.

Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madahka, pemansang nya nunjukka projek ti bekaul diatu udah tumu ari taga ke ditetapka.

“Diatu pemansang kebendar sepenyampau 33.65 peratus, enti dibanding enggau 30.79 peratus ke diperambu. Tu bereti kitai tumu ari taga sepenyampau 2.86 peratus.

“Utai ke manah nya kitai dipadahka kontraktor udah ngembuan perkara ke diguna ba ditu, ngaul aluminium, mua begunan enggau mega begian ba dalam tu nyadi siti pemansang ti chukup ngemantup ati,” ku iya.

Abdul Karim mansutka penemu nya rambau aum media pasal Pemansang Projek enggau Ngabas Taba Projek Ngemanahka Stadium Sarawak ditu sehari tu tadi.

Iya mega madahka, kereban ti disediaka enggau barang ke dikedeka konteriktor mega meri kelai manah ngagai pengelanchar pengawa bejalaika projek nya.

Ku iya, pemansang ke bisi diatu patut diteruska dikena nyamin pengawa ngemanahka ulih ditembuka nitih taga sereta nangkup peminta nyadi siti ari palan besai Lumba SEA 2027.

Stadium Sarawak ditaga megai tanggungjawap besai dalam pekit lumba rantau nya, nyengkaum nyadi palan endur bejadika pengerami Lumba SEA 2027. – TVS