Perambu palan ngumpul, kilang nginjin lada di Betong ditisih

SPAOH, 17 Sept: Opis Menteri Estet enggau Komoditi (KPK) tebuka berunding bekaul enggau perambu ngaga palan ngumpul tauka kilang nginjin lada di bagi menua Betong.

Menteri KPK, Datuk Seri Dr Noraini Ahmad, madahka raban sida deka minta Kaunsil Lada Malaysia (MPB) mansik enggau silik perambu nya, meda urung potensyel Betong nyadi entara palan pengeluar lada di Sarawak.

Ku iya, bagi menua Betong diatu ngembuan 5,070 pekebun lada enggau pemesai utai tanam urung 1,102.8 hektar.

“Kitai tebuka ngagai perambu bekaul perkara tu. Taja pan pia, aku deka minta Kaunsil Lada Malaysia mansik enggau silik perambu nya,” ku iya.

Dr Noraini mansutka penemu nya rambau dirandau raban media sepengudah bejadika Seminar Penegap Industri Lada 2026 di Spaoh, sehari tu tadi.

Udah nya, iya nerangka sebengkah pekara dikena negapka industri lada di Sarawak, kelebih agi di Betong mega udah dikerandau enggau Sapit Premier Sarawak, Datuk Amar Douglas Uggah Embas sereta Menteri Industri Pemakai, Komoditi enggau Pemansang Menua Pesisir Sarawak (M-FICORD), Dato Sri Stephen Rundi Utom.

Terang iya, perambu nya ngaul koordinasi entara perintah besai enggau Sarawak dalam mantu nambahka penatai pemisi pekebun lada, kelimpah ngenegapka pengelandik pekebun sereta pengawa nyuaka bantu enggau insentif ngagai komuniti pekebun.

“Opis Menteri deka terus bekerejasama enggau perintah Sarawak dikena nyamin atur, program enggau puncha ke bisi dikena ngemansangka industri betanam betupi, nyengkaum lada seraya nyukung pangan diri ,” ku iya. – TVS