Sebun Asap: 20 kandang endur agi ngerikodka IPU enda beresi

KUALA LUMPUR, 19 Sept : Bisi 20 kandang endur di selampur menua ngerikod bacha Indeks Pengamah Angin (IPU) ba tikas enda beresi naka pukul 9 pagi tadi.

Nitihka portal Sistem Pengatur Indeks Pengamah Angin Malaysia (APIMS), bacha pemadu tinggi dirikodka ba Kuching (169) enggau IPU Serian (169) di Sarawak, ditangkan enam sitak di nengeri tu bela ngerikodka IPU enda beresi, iya nya Samarahan (163), Sri Aman (162), Sibu (159), Sarikei (152), Bintulu (135) enggau Kapit (118).

Dua sitak ba Perak bela ngerikodka bacha IPU enda beresi iya nya Seri Manjung (164) enggau Tanjung Malim (113), ditangkan ba Selangor mungkur Shah Alam (157), Petaling Jaya (139) enggau Johan Setia (113).

Kelimpah ari nya, Kuala Lumpur mega ngerikodka dua kandang endur ba tikas enda beresi, iya nya Batu Muda (155) enggau Cheras (155), sereta Putrajaya (154).

IPU enda beresi bela dirikodka ba Nilai, Negeri Sembilan (151); Larkin, Johor (139); Bukit Rambai, Melaka (111); enggau Tawau, Sabah (108).

Berebak enggau nya, bisi 37 kandang endur ngerikodka bacha ba tikas jelan, ditangkan 10 kandang endur ngerikodka bacha tikas manah.

Bacha IPU kosong nyentuk 50 mandangka kualiti angin manah, 51 nyentuk 100 (jelan), 101 nyentuk 200 (enda beresi), 201 nyentuk 300 (chukup enda beresi) enggau 301 ke atas (ulih nganu nyawa).